Leonard Rrapi, 30 vjeç, një nga pesë personat që mbetën të plagosur në aksidentin e një dite më parë në Berat, ka ndërruar jetë. Mësohet se Rrapi ndodhej në spitalin e Traumës që prej natës së kaluar, aty ku po mjekohej, por nuk u ka mbijetuar dot plagëve të marra.
30-vjeçari ishte duke shëtitur në qytetin e Beratit së bashku me miqtë e tij, Abaz Kaballi 60-vjeç, Astrit Veliu 23-vjeç dhe Tahir Redhi 30-vjeç, kur automjeti tip Benz me targa AA 021 MS humbi kontrrollin duke marrë para 5 të rinjtë dhe hyri brenda një dyqani me pajisje elektro-shtëpiake në qendër të qytetit.
Miqtë nga Tepelena sapo ishin kthyer nga peligrinazhi në Malin e Tomorrit dhe kishin vendosur në kthim të vizitonin edhe qytetin e Beratit. Drejtuesi i mjetit Ergys Petro, 26-vjeç mësohet se nuk kishte konsumuar alkool në momentin e aksidentit të rëndë. Ai ndodhet gjithashtu në spital ku u vu sot në pranga.
Sipas policisë, aksidenti u shkaktua si pasojë e shpejtësisë së madhe dhe parakalimit të gabuar. Drejtuesi i mjetit është banor i lagjes “Kushtrim” në Berat dhe punonte si saldator. Burime nga miqtë e të njohurit e tij kanë deklaruar se kohët e fundit Petro kishte filluar të konsumonte lëndë narkotike.
