Një ditë pas ngjarjes, policia ka bërë sot të mundur zbardhjen e konfliktit të armatosur në Korçë në afërsi të një kompleksi në Malin e Moravës, ku u plagos me sende të mprehta e të forta S. M., 68 vjeç, banues në Korçë. Policia njofton se kanë rënë në pranga për veprat penale “Kanosja” dhe “Armëmbajtja pa leje” djali i shtetasit E. M., 33 vjeç, banues në Korçë.
Nga deklarimet e marra dhe nga këqyrja e pamjeve filmike rezulton se, i riu E. M., gjatë një konflikti për motive të dobëta me A. R., 26 vjeç, banues në Tiranë, e ka kanosur këtë të fundit me një send, në dukje si armë zjarri tip pistoletë.Ndër të tjera në njoftimin për shtyp policia jep detaje se shtetasi A. R., më pas ka plagosur me sende të mprehta e të forta, babain e 33-vjeçarit, shtetasin S. M., i cili ka qenë i pranishëm në vendngjarje dhe aktualisht ndodhet në Spitalin e Korçës, në gjendje të rëndë shëndetësore. Gjatë këtij konflikti ka marrë dëmtime të lehta edhe shtetasi E. M., i cili ndodhet jashtë rrezikut për jetën.
Shtetasi A. R., u arrestua në flagrancë nga Policia menjëherë pas ngjarjes së ndodhur për veprën penale “Plagosja e rëndë me dashje”.
Materialet në ngarkim të shtetasve E. M dhe A. R., i kaluan Prokurorisë pranë Gjykatës së Shkallës së Parë Korçë për hetime të mëtejshme.
