Kristian dhe Amantia Toska, dy të miturit shqiptarë që janë mbajtur peng nga i ati, kanë arritur të shpëtohen pas disa muajsh kërkime. Mediat e huaja shkruajnë se dy të miturit janë gjetur në komunën Caldas da Rainaha në Portugali, rreth 100 km larg Lisbonës. Në raportim, thuhet se fëmijët ndodheshin nën shoqërinë e babait të tyre. Ky i fundit, është vënë në pranga e akuzohet për rrëmbimin e fëmijëve. Lajmi është konfirmuar edhe nga policia portugezë, që ndër të tjera thotë se fëmijët ndodhen në gjendje të mirë shëndetësore.
Kujtojmë se familja Toska jetonte në Gjermani prej vitesh dhe në muajin dhjetor të vitit që lamë pas, fëmijët, u rrëmbyen nga i ati. Fillimisht u tha se ai i dërgoi ato në Tenerife të Spanjës. Nëna e fëmijëve, hapi një hetim për rastin dhe për gjetjen e dy vogëlushëve u angazhuan një sërë forcash operacionale të vendeve të ndryshme.
Për gjetjen e fëmijëve, pak ditë më parë bëri thirrje edhe partnerja e Ronaldos, Georgina Rodriguez, e cila postoi në rrjete sociale foto të vogëlushëve dhe nxiti autoritetet që të hetonin rastin.
