Me anë të një njoftimi zyrtar, Autoriteti Portual i Durrësit ka bërë me dije shtyrjen e udhëtimin për pasagjerët që do të udhëtonin mbrëmjen e sotme për në Bari.
Në njoftim thuhet se shkak i kësaj vonesë është bërë një problem teknik i tragetit duke kërkuar mirëkuptimin e qytetarëve. Autoriteti Portual Durrës thotë se do të ketë një njoftim të dytë për orarin e ri të nisjes.
Njoftimi i Autoriteti Portual i Durrësit
Njoftojmë pasagjerët që kanë rezervuar lundrimin mbrëmjen e sotme nga Porti i Durrësit drejt Barit me tragetin “AF Francesca”, se për shkak të një avarie të pësuar trageti nuk ka bërë nisje nga Porti i Barit sipas orarit të parashikuar, për rrjedhorë as nisja e parashikuar nga Porti i Durrësit nuk do të bëhet sot në orarin e paracaktuar.
Autoriteti Portual Durrës, kërkon mirëkuptimin e udhëtarëve, ndërsa po vijon puna me agjencinë lundrimore “Adria Ferries” për zgjidhjen sa më shpejt të kësaj situate.
Në një moment të dytë, do të njoftohen udhëtarët për orarin e ri të nisjes ose rimbursimin e biletës nga kompania Adria Ferries.
Për çdo pyetje apo nevojë të udhëtarëve kemi vendosur në dispozicion numrin e gjelbër falas: 0800 73 74.
