Një operacion anti-drogë është zhvilluar mëngjesin e sotëm në të gjithë qarkun e Vlorës. Policia njofton se nga aksioni i forcave speciale “Shqiponja” janë vënë në pranga dy persona, lokalizimi i të cilëve është bërë me dron. Më konkretisht në kuadër të operacionit “Bastrova” u arrestuan Augest Lame, 28 vjeç, banues në fshatin Bestrovë dhe Detjan Selimaj, 35 vjeç, banues në fshatin Drashovicë, Vlorë. Ndërsa uniformat blu japin detaje se personat në fjalë dyshohen se kanë bashkëpunuar me dhe kanë kultivuar bimë të dyshuara cannabis sativa, në një sipërfaqe toke në vendin e quajtur “Çeplazet”, në fshatin Bestrovë.
Gjatë kontrollit të ushtruar nga Policia, në ambientet ku qëndronin këta dy shtetas u gjetën dhe u sekuestruan në cilësinë e provës materiale një sasi lende narkotike kanabis, 4 armë zjarri automatike, municion luftarak, 3 radiomarrëse, 3 aparat celular, 1 automjet dhe 1 motomjet.
Materialet i kaluan Prokurorisë pranë Gjykatës së Shkallës së Parë Vlorë, për veprat penale “Mbajtja pa leje dhe prodhimi i armëve, armëve shpërthyese dhe i municionit”, “Prodhimi dhe shitja e lëndëve narkotike” dhe “Kultivimi i bimëve narkotike”, të kryera në bashkëpunim.
