Kryeministri Edi Rama ka dhënë një intervistë për BBC World News ku deklaroi se Shqipëria pavarësisht se nuk është vend i pasur, ka mjaftueshëm për të ndarë me qytetarët afganë, të cilët tashmë janë strehuar në vendin tonë. Ai përsëriti se dikur, 30 vite më parë, shqiptarët kanë qenë në vend të afganëve, që iu desh të rendnin vendeve të Europës, për t’i shpëtuar regjimit komunist.
“Ne kemi qenë në këtë pozitive jo shumë kohë më parë. 30 vite më parë ishim ne afganët që përpiqemi që t’i largoheshim ferrit të tyre, për të mbërritur në Evropë. Ka qenë mjaftë e ngjashme sa i takon udhëtimit, dhimbjes dhe ankthit të së panjohurës. Jemi të prirur që ta bëjmë këtë, pasi kjo nderon traditën tonë, historinë tonë dhe ne vete. Ndërkohë po bëjmë diçka që unë besoj se ua detyrojmë fëmijëve tanë që ata të rriten që në këtë jetë ka një kohë të japësh dhe një kohë kur ti merr. Ne nuk jemi vend i pasur, por jam besimplotë se kemi mjaftueshëm për të ndarë me këta njerëz dhe se do të jemi së bashku. Nuk jemi të vetëm. Ka shumë organizata që po kujdesen për ta dhe kanë bërë përpjekje të jashtëzakonshme për t’u nxjerrë prej vendit të tyre” – tha Rama.
Rama gjithashtu tha se asnjë shtet i pasur perëndimor, nuk ka ofruar mbështetje për Shqipërinë në akomodimin dhe mbajtjen e qytetarëve afganë dhe se po mbështetemi vetëm tek solidariteti dhe ndihma e shqiptarëve.
“Ne për momentin po mbështetemi vetëm tek bashkëpunimi me njerëzit që kanë zemër të pasur. Nga vendet e pasura jo. Është numër i konsiderueshëm i shqiptarëve që jetojnë kudo në botë dhe SHBA që kanë ndihmuar. Bukë e kripë e zemër, është thelbi i solidaritetit. Nuk do të zhdukemi nga faqja e tokës sepse refugjatë që po i ikin vdekjes po na trokasin në derë. Kemi pritur gjysmë milioni kosovarë dhe kemi qenë më të varfër. Jemi pasuruar më tej moralisht, në shpirt dhe mësuam se në këtë jetë kujtesa është shumë e rëndësishme”- tha kryeministri Rama.
