Prej disa ditësh, talebanët po luftojnë me ish-komandot afgane në Luginën e Panjshirit. Ky rajon është i vetmi i cili nuk ka rënë në duart e talebanëve.
Një ditë më parë u raportua se këta të fundit kishin aneksuar luginën, por më pas ky lajm u përgënjeshtrua nga forcat e rezistencës.
Burime nga talebanët informojnë se vazhdon avancimi i forcave të tyre, por se përparimi ka qenë i ngadaltë sepse rruga drejt kryeqytetit krahinor Bazarak është minuar.
Banorët e rajonit të Panjshirit kanë një histori të gjatë rezistence si ndaj qeverisë së mëparshme talebane në vitet ’90, ashtu edhe ndaj pushtimit sovjetik.
Aktualisht situata në aeroportin e Kabulit duket se është normalizuar ndërsa kanë filluar sërish fluturimet, por vetëm për emergjencat.
