Deputeti i LSI, Petrit Vasili ka reaguar në rrjetet sociale duke sjellë në vëmendje rëndësinë e kësaj partie në kontributet për reformat e ndryshme ndërsa etiketoi kryeministrin Rama si minues të reformave në vend dhe shkaktar të masakrës zgjedhore të 25 prillit.
LSI ishte kontribuesja kyç dhe ishte realisht ajo, që realizoi Reformën në Drejtësi me konsensusin historik me 140 vota, që ishte edhe arsyeja vendimtare e marrjes për herë të parë të rekomandimit për hapjen e Negociatave për Anëtarësim në BE. Sot kapja e Drejtësisë nga rilindja dhe kolapsi total i sistemit të drejtësisë është një e vërtetë tragjike dhe e pamohueshme. LSI ishte kontribuese shumë aktive për marrëveshjen e 5 qershorit për zgjedhje te lira dhe te ndershme. Kjo marrëveshje u shkatërrua nga rilindja dhe ky shkatërrim prodhoi masakrën zgjedhore te 25 prillit. LSI ishte ajo qe paraqiti ne Kuvend Projekt Ligj kundër Koncesioneve korruptive, që grabisnin qindra miliona euro dhe ky projektligj u bllokua dhunshëm e me çdo mjet nga rilindja ne parlament. Shmangia nga këto tre çështje madhore që janë kapja e drejtësisë, kapja zgjedhjeve dhe kapja e ekonomisë përmes koncesioneve është realisht krijimi i alibive për legalizimin e kapjes së shtetit nga Edi Rama, që do të thotë vazhdim i rrënimit të vendit dhe shpopullimit të tij.
