Lajme të trishta janë dëgjuar dhe raportuar nga Kosova në lidhje me vdekjet nga Covid, kryesisht gra shtatzënë. 4 gra të cilat ishin në pritje të ëmbël humbën jetën këtë javë duke shkaktuar një bilanc të rëndë dhe tragjik për vendin.
Fikrete Sadikaj nga Lëbusha e Deçanit nuk u mbijetoi pasojave që ia solli Covid-19, ashtu sikurse nuk jetoi më shumë se tri ditë edhe e vogla, Klea ngase u lind para kohe.
38-vjeçarja që ishte në muajin e shtatë të shtatzënisë nuk ishte vaksinuar, kurse bashkëshorti i viktimës thotë se nuk kanë pasur mjaftueshëm informacione rreth kësaj mundësie për këtë kategori.
Të premten Covid i mori jetën edhe një 28 vjeçareje nga Vushtrria, po ashtu shtatzënë. Liberta Selaci po trajtohej në njësinë intensive të QKUK-së. Ajo ishte 25-javëshe shtatzënë.
Me 1 shtator humbi jetën dhe një tjetër grua shtatzënë. Ajo jetonte në Gjermani, prej nga kishte ardhur në Gjilan për pushime, dhe nuk ka qenë e vaksinuar.
Gjatë këtij viti, pesë gra shtatzëna të pa vaksinuara kanë humbur jetën, tri nga të cilat kanë kryer edhe lindjen. Sipas shefit të klinikës së Mjekimit Intensiv, Mentor Alimusaj, aktualisht në këtë klinikë po trajtohet edhe një grua tjetër shtatzënë në gjendje të rëndë.
