Detaje të reja kanë dalë nga vrasja e biznesmenit 40-vjecar, Bledar Birçaj ditën e djeshme në Vlorë. Birçajt iu bë atentat nga dy persona, të cilët qëlluan me breshëri plumbash në drejtim të makinë BMW X5, duke e lënë të vdekur në vend.
Së bashku me viktimën, në makinë ndodhej një person tjetër i cili iu shpëtoi plumbave. Ai ka dhënë dëshminë e tij para autoriteteve, ku ka deklaruar se nuk ka mundur të njohë asnjë nga autorët pasi ishin të kamufluar.
“Ishim të papërgatitur, na bënë pritë. Ramë direkt pre e breshërisë së kallashnikovit. Pashë dy veta me maska por nuk i njoha dot. Ishin të kamufluar. Nuk jam në dijeni të ndonjë konflikti të fundit”, është shprehur ai.
Policia deri më tani për vrasjen e biznesmenit ka shoqëruar 15 persona, ndërsa në vendin e krimit ka sekuestruar 29 gëzhoja.
Pistë kryesore e grupit të hetimit është e shkuara e viktimës në Spanjë prej nga bënte shpesh vajtje ardhje nga Shqipëria. Në Vlorë nuk njihej si person problematik, por si biznesmen pasi ishte pronar i një lokali të quajtur “The Boss” të njohur në zonën e Lungomares.
