Eksperti kryesor i Qeverisë amerikane për sëmundjet infektive, Anthony Fauci, tha se rregullatorët amerikanë pritet që së shpejti të japin leje për dhënien e dozave përforcuese të vaksinës Pfizer/BioNTech.
Fauci tha se shpërndarja e dozave të treta të vaksinës Pfizer/BioNTech mund të fillojë këtë muaj, ndërsa miratimi dhe shpërndarja e dozave të vaksinës Moderna mund të zgjasi pak më shumë.
Fauci shtoi se të dy përforcuesit supozohet të jenë të sigurt, por Administrata e Ushqimit dhe Barnave e SHBA-së (FDA) është duke studiuar të dhënat për t’u siguruar.
Autoritetet kanë rekomanduar që njerëzit të marrin vaksinën e tretë Pfizer/BioNTech ose Moderna tetë muaj pas marrjes së vaksinës së dytë dhe kanë caktuar 20 shtatorin si datë që furnizuesit të fillojnë shpërndarjen.
Shkencëtarët janë ende duke debatuar se sa imunitet sigurojnë dozat përforcuese dhe nëse të gjithë amerikanët duhet t’i marrin ato apo vetëm ata me imunitet të dobët dhe të moshuarit.
Autoritetet amerikane kanë thënë se Shtetet e Bashkuara kanë furnizime të mjaftueshme për të shpërndarë doza përforcuese te populli amerikan dhe për të vazhduar dërgimin e dozave në vendet e tjera.
Izraeli tashmë është duke ofruar doza përforcuese për njerëzit mbi moshën 50 vjeç, ndërsa dhe më 1 shtator, edhe Franca nisi të japë doza përforcuese për njerëzit mbi 65 vjeç dhe ata me imunitet të dobët.
Qeveria italiane ka thënë se do të fillojë të ofrojë dozën e tretë për grupet e cenueshme, siç janë ato me sistem të dobët imunitar, duke nisur nga fundi i këtij muaji.
Edhe Qipro ka thënë se do t’u japë dozën e tretë personave mbi 65 vjeç, vaksinimi i plotë i të cilëve është bërë para më shumë se gjashtë muajsh.
