Pandemia ka ndërgjegjësuar qytetarët të cilët si asnjëherë më parë kanë paguar siguracionin për jetën. Të dhënat tregojnë se gjatë vitit pandemik qytetarët e Tiranës zënë vendin e parë për pagesën e siguracionit të jetës. Sipas të dhënave zyrtare të Autoritetit të Mbikqyrjes Financiare, vlera më e lartë e primeve të shkruara bruto për siguracionin e jetës regjistrohet në Tiranë me rreth 1 miliardë lekë, e ndjekur nga Durrësi dhe Shkodra, ndërsa më e ulëta në Dibër me 495 mijë lekë, ku vihet re se është paguar vetëm për llojin e sigurimit “jetë debitori”, i cili është detyrim për shkak kredie të marrë nga bankat tregtare. Në total, 1.2 miliardë lekë kanë paguar qytetarët shqiptarë për siguracione jete gjatë vitit 2020, ku dhe pandemia Covid-19 ishte në kulmin e saj.
Ndërsa në të kundërt, banorët e Tiranës kanë paguar për të gjitha llojet e sigurimit, si jetë debitori, jeta në grup, jetë e kombinuar, jeta dhe shëndeti në udhëtim, plani i pagesave cash si dhe jeta me kursim, ku kjo e fundit zë një pjesë të konsiderueshme.
Sa i takon, numrit të kontratave të siguracioneve të jetës sipas prefekturave, totali regjistrohet në 89.689 përgjatë gjithë vitit që lamë pas, ndërsa Tirana sërish zë vendin e parë me mbi 71 mijë kontrata jete, dhe Dibra përsëri listohet në vendin e fundit me vetëm 73 kontrata.
