Drejtori sportiv i Vllaznisë, Matko Djarmati ka theksuar se kuq e blutë janë më cilësorë se sezonin e kaluar duke lënë të kuptohet që edicionin e ri objektivi primar do të jetë titulli kampion.
“ Të gjitha piketat që kemi vendosur në muajin prill të kampionatit të kaluar sa i përket merkatos, i kemi realizuar. Plani ynë ishte që këto përforcime që kemi bërë, t’i konkretizonim përpara ndeshjeve të Europës. Vetëm në këtë aspekt jam i pakënaqur, por nuk mundëm të realizonim diçka të tillë për arsye të ndryshme. E rëndësishme është që kemi afruar në këtë merkato të gjithë lojtarët që ne kemi planifikuar për t’i marrë te Vllaznia që në muajin prill.
Ideja jonë në merkato ishte rifreskimi në çdo pozicion i ekipit dhe ndërtimi i një grupi me 25 lojtarë, që janë gati të luajnë të gjithë në çdo moment për Vllazninë.
Ky qytet kërkon prapë trofe dhe të mban zgjuar 24 orë, nuk fle dot. Për këtë arsye, ne e kemi fshirë atë që kemi arritur në sezonin e fundit dhe jemi fokusuar 100 % për kampionatin që do të nisë këtë javë.
Objektivat janë njësoj si vjet. Minimalisht duhet të jemi në Europë, por këtë sezon patjetër që do të shkojmë deri në fund për titullin kampion. Kjo do të jetë ajo që na intereson më shumë”, theksoi drejtori i Vllaznisë, Matko Djarmati.
