Edhe pse rastet e të infektuarve me COVID-19 në Kosovë janë duke u rritur, vendimi për fillimin e vitit të ri shkollor nuk ka ndryshuar, ku bëhet me dije se nga 13 shtatori do të hapen dyert e institucioneve arsimore për nxënësit dhe mësimdhënësit.
Vendimi u mor sot në mbledhjen e Komitetit për koordinimin dhe vlerësimin e situatës me pandeminë COVID-19.
Zëdhënësi i Ministrisë së Shëndetësisë, Faik Hoti, ka deklaruar se në mbledhje të gjitha institucionet kanë raportuar për zhvillimet.
“Mbledhja është përfunduar, kishte raportim të institucioneve. Tani për tani, mbetet në fuqi vendimi për shkollat, ndërsa ditëve në vijim do të monitorohet ecuria e situatës epidemiologjike. Tani për tani, mbesin në fuqi masat nga vendimet e fundit të Qeverisë lidhur me COVID-19”, ka thënë Hoti.
