Komisioni i Pavarur i Kualifikimit, ka shkarkuar nga detyra gjyqtaren e Gjykatës së Korçës, Ariola Kristo.
Gjatë seancës dëgjimore të zhvilluar të mërkurën, Komisioni bëri me dije se kishte gjetur gjatë hetimit administrativ një sërë problemesh në pasuritë e gjyqtares së Korçës Ariola Kristo.
Problemet lidheshin kryesisht me mungesën e burimeve të ligjshme për ndërtimin e një shtëpie 3 kate plus bodrum në qytetin e Korçës në vitet 2006-2008. Nga analiza financiare ishte konstatuar balancë negative fondesh në shumën 6.8 milionë lekë, për kryerjen e investimeve dhe përballimin e shpenzimeve.
Trupi gjykues që kreu procesin e rivlerësimit për Kriston kryesohej nga Lulzim Hamitaj, me relatore Alma Faskaj dhe anëtare Genta Tafa (Bungo).
Ariola Kristo përfundoi studimet në Shkollën e Magjistraturës në vitin 2003 dhe u emërua gjyqtare në Gjykatën e Korçës. Ajo punoi prej gati dy dekadash pranë kësaj gjykate.
