Partia Demokratike do të mbledhë ditën e sotme në selinë blu Kolegjin e Kryetarëve, si dhe kryetarët e degëve të PD. Mbledhja pritet të nisë në orën 11:00, ndërsa vjen dy ditë pas vendimit të Bashës për të përjashtuar nga grupi parlamentar ish-kryeministrin deh liderin historik të PD, Sali Berisha.
Ish-kryeministri Berisha kundërshtoi vendimin duke u paraqitur ditën e djeshme në Kuvend i shoqëruar nga deputetë e tij besnik Flamur Noka, Edi Paloka dhe Dritan Shehu.
Lulzim Basha njoftoi dy ditë më parë vendimin e tij personal si kryetar për të përjashtuar Berishën nga grupi parlamentar i PD, derisa të zgjidhte pozicionin me DASH pas shpalljes “non grata”.
Menjëherë Berisha e kundërshtoi vendimin e Bashës duke e akuzuar këtë të fundit për pakte me Edi Ramën dhe se ka qenë i detyruar pasi është kërcënuar me sanksione.
Mbrëmjen e djeshme, Berisha, ndër të tjera, tha se për shpalljen “non grata” nga SHBA, përveç lobimit të Soros dhe Ramës, ka lobuar edhe Lulzim Basha. Berisha tha se dy persona një nga Washingtoni dhe një nga Tirana i kanë thënë se Basha po lobon kundër tij. Ish-kryeministri ka thënë më herët që do bëjë çdo gjë për t’i rikthyer PD-së shkëlqimin e dikurshëm duke nënkuptuar edhe masa për largimin e Bashës nga pozicioni i në krye të PD.
