Kryeministri i vendit, Edi Rama ka kujtuar 20-vjetorin e ditës sw sulmeve terroriste në SHBA, duke u shprehur se 11 shtatori mbetet një ditë vetëdije e botës demokratike. Në mesazhin e përcjellë nëpërmjet rrjeteve sociale, kreu i qeverisë e kujton 11 shtatorin si një ditë e zezë, që goditi qytetërimin demokratik.
“20 vjet më parë, 11 shtatori hyri në histori si dita e zezë e sulmit të egër të urrejtjes barbare kundër qytetërimit tonë, duke goditur mizorisht simbolin e tij, Amerikën, mu në zemrën e saj. Sot e përgjithmonë, 11 shtatori do të mbetet një ditë kujtese dhe vetëdijeje e botës demokratike për vlerat e paçmueshme të lirisë e të demokracisë”, shkruan Rama.
Një mesazh për sulmet terroriste ka përcjellë edhe ministrja e Mbrojtjes Olta Xhaçka. “Sulmet e 11 shtatorit 2001 janë një nga ato ngjarje që vështirë do të shlyhen ndonjëherë nga kujtesa. Por mbi të gjitha, 11 shtatori është një ditë për të përkujtuar e nderuar kujtimin e atyre mijëra jetëve të pafajshme të humbura atë ditë e për të qenë më të bashkuar se kurrë edhe në emër të tyre, kundër terrorizmit e ekstremizmit”, tha Xhaçka.
Më herët, edhe kreu i opozitës Lulzim Basha ka dhënë një mesazh në përkujtim të sulmeve terroriste në SHBA, ku u shpreh se Shqipëria qëndron në krah të partnerit strategjik. Gijotina.com
