Presidenti Ilir Meta ka dekretuar emërimin e Edi Ramës si kryeministër të Shqipërisë, në limitet e afatit maksimal prej 7 ditësh. Zyra e presidentencës ka ndarë dokumentin që tregon dekretin i cili do të hyjë në fuqi menjëherë.
Dokumenti që mbante firmën e Sekretarit të Përgjithshëm të Partisë Socialiste, Damian Gjiknuri u dërgua në presidencë më 4 shtator, e ndërsa Meta hodhi firmën e tij, sot, 11 shtator.
Me mandatimin e kryeministrit nga Presidenti, Rama i paraqet për miratim Kuvendit, brenda 10 ditëve, programin qeverisës dhe emrat e ministrave parlamentit. Pas miratimit në Parlament, kryeministri i dërgon Presidentit për dekretim ministrat, i cili duhet të shprehet brenda 7 ditëve. Dekretet e miratuara nga Presidenti kalohen sërish nga kuvendi në një afat 10 ditë. Para fillimit të detyrës, Kryeministri, zëvendëskryeministri dhe ministrat do të betohen para Presidentit.
Parlamenti i ri nisi punimet ditën e djeshme dy seanca plenare, njëra në 10:00 e tjera në 17:00. Në seancën e parë, e drejtuar nga deputetja e PS, Luljeta Bozo u bë verifikimi i mandatit të deputetëve, ndërsa në seancën e dytë u bë emërimi i Lindita Nikollës si kryetare e Parlamentit, ku PD grisi fletët e votimit, ndërsa LSI votoi kundër.
