Kreu i PBDNJ Vangjel Dule, i dalë deputet në listat e PD, ndryshe nga grupi i tij parlamentar, që grisi fletët e votimit, u pa në seancë të votonte.
Ky veprimi i tij ngjalli dyshime lidhur me votën e tij, pro apo kundër emërimit të Lindita Nikollës si Kryetare, ndërsa sot ai ka reaguar zyrtarisht.
Me anë të një deklarate për mediat, ka sqaruar se vota e tij ka qenë kundër kandidaturës së Nikollës.
“Ashtu siç pata kurajon publikisht të diferencohem, për arsye konceptimi të ndryshëm, nga shumica e kolegëve opozitarë në mënyrën e votimit, për më tepër nuk më mungon ajo ta pohoj po publikisht, në respekt të së drejtës së qytetarëve për të ditur të vërtetën që tentohet të shtrembërohet qëllimisht, pavarësisht se nuk është etike në rastin e votës së fshehtë, se vota ime ishte kundër kandidaturës së Zonjës Nikolli”, shkruan Dule në Facebook.
Lindita Nikolla, u zgjodh Kryetare e Kuvendit pas një votimi ku morën pjesë 137 deputetë, nga 83 vota të vlefshme siguroi 79 vota pro dhe 4 kundër, të cilat ishin të LSI-së.
