Sekretari i Shtetit pranë Ministrisë së Jashtme Gjermane, Miguel Berger, i ka bërë thirrje vendeve të tjera të BE-së të shmangin pengesat për integrimin e Shqipërisë dhe Maqedonisë së Veriut. Gjatë një interviste për DW ai ka parashtruar çështjet që duhen zgjidhur menjëherë në lidhje me Ballkanin Perëndimor.
I pyetur nëse BE po e zvarrit shumë çështjen e integrimit dhe vendet kandidate po e humbasin besimin, Bereger tha se në të vërtetet duket një farë zhgënjimi prandaj vendet anëtare duhet të marrin më seriozisht dialogun për Shqipërinë.
“BE-ja po bën shumë për të ardhmen e Ballkanit Perëndimor. Për shembull me Planin e Ekonomisë dhe Investimeve, i cili kap shuma prej disa miliardë dollarësh dhe ka në fokus, ndër të tjera, transformimin ekologjik dhe digjital. BE-ja është dhe do të mbetet partnerja më e afërt dhe më e besueshme e gjashtë shteteve të Ballkanit Perëndimor. Ka njëfarë zhgënjimi, por gjatë udhëtimit tim në rajon përjetova edhe një afri dhe një interes të madh për BE-në. Por ne, domethënë BE-ja, duhet ta bëjmë të qartë se e marrim seriozisht rrugën e Ballkanit Perëndimor drejt BE-së. Kjo është arsyeja se përse është kaq e rëndësishme që negociatat e zgjerimit me Shqipërinë dhe Maqedoninë e Veriut të fillojnë sa më shpejt të jetë e mundur”, tha ai.
Ndër të tjera ai shtoi se Berlini po bënë përpjekjet e tij për të rritu ritmin e integrimit për vendet e Ballkanit Perëndimor, sepse deri më tani ka qenë shumë i ngadaltë. Ndërsa për “Open Ballkan” ai tha se e sheh si një alternativë të përkohshme, sepse Ballkani e ka të ardhmen e tij në BE.
“Procesi i Berlinit, i iniciuar nga Kancelarja Gjermane, Angela Merkel, në vitin 2014, për të promovuar bashkëpunimin rajonal duhet parë si një mbështetës i procesit të zgjerimit të BE-së. Ritmi i integrimit të rajonit në BE është vërtet i pakënaqshëm. Vitin e kaluar, Bashkimi Evropian e modifikoi procedurën e zgjerimit, në mënyrë që t’i japë më shumë dinamikë procesit të zgjerimit, por edhe reformave të nevojshme. BE-ja i mbështet vendet e Ballkanit Perëndimor edhe financiarisht. Në përgjigje të situatës së vështirë që krijoi pandemia në rajon, në prill 2020, rajonit iu dha një paketë ndihmash emergjente, në shumën prej 3.3 miliardë euro. Në Tetor 2020, Komisioni Evropian prezantoi një Plan Ekonomie dhe Investimesh, me një vëllim të përgjithshëm deri në 9 miliardë euro, për rimëkëmbjen afatmesme ekonomike të Ballkanit Perëndimor. E gjitha kjo nënvizon se BE-ja vazhdon të jetë shumë e angazhuar dhe ofron stimuj të ndryshëm për të promovuar proceset e reformave në Ballkanin Perëndimor, si edhe për të promovuar integrimin e vendeve në BE”, u shpreh Bereger.
