Gjykata e Posaçme ka rrëzuar kërkesën për liri të ish kreut të Bashkisë së Lushnjës, Fatos Tushe. Ky i fundit me argumentin se nuk është mirë nga gjendja shëndetësore, kërkoi zbutje të masës “Arrest në burg”, por kërkesa është rrëzuar nga gjyqtari Erion Çela.
Edhe më herët ish kreu i Bashkisë Lushnjë, i akuzuar për “Shpërdorim detyre”, pasi dyshohet se ka abuzuar me fondet publike, ka kërkuar ndryshim të masës, teksa para Gjykatës ka mohuar akuzat, duke pretenduar pafajësi.
Arrestimi i tij u bë më 6 korrik gjatë një operacioni anti-korrupsion të zhvilluar nga SPAK, me mbështetjen e Forcave të Ndërhyrjes së Shpejtë dhe RENEA-s. Hetimet për personat e përfshirë në këtë skemë abuzimi, mësohet se kanë qenë nën hetim prej 6 muajsh, ndërkohë që SPAK ka kërkuar që të bëhet kontroll edhe në zyrën e Fatos Tushes.
SPAK ka kërkuar sekuestrimin e dosjes në zyrën e Kadastrës dhe të ndërmarrjes së punëve publike, ndërsa që akuzat që rëndojnë mbi ta janë ”shpërdorimi i detyrës” dhe korrupsioni duke shpërdoruar fondet publike.
Tushe ka drejtuar Bashkinë që prej 2019-tës, ndërkohë që në 31 Dhjetor të atij viti iu bë dhe një atentat me granat brenda në zyrën e tij. Përpara kandidimit për Bashkinë Lushnjë në 2019, Tushe ka shërbyer si deputet i Parlamentit për zonën e Fierit, anëtar i Partisë Socialiste dhe anëtar në Komisionin e Prodhimit, Tregtisë dhe Mjedisit./ Gijotina.com D.L
