Vetëm 13 ditë para zgjedhjeve parlamentare, pretendentët për kancelar në Gjermani, kanë nisur debatet televizive duke shpalosur njëkohësisht dhe programet e tyre qeveriswse.
Në debatin e djeshëm, socialdemokrati gjerman, Olaf Scholz ishte më bindësi me 41% të miratimit nga telespektatorët e një debati televiziv mes kandidatëve për kancelar, sipas sondazhit të emisionit “Triell” të transmetuar në kanalet publike ARD dhe ZDF.
Kandidati i CDU-CSU, Armin Laschet, arriti të merrte 27% të miratimit, ndërsa Annalena Baerbock e të gjelbërve rezultoi në kuotën 25%. Kështu, zëvendëskancelari i SPD fitoi edhe debatin e dytë televiziv.
Sipas sondazhit, Scholz ishte perceptuar gjithashtu si “më kompetenti dhe më i besueshmi”, ndërsa Baerbock ishte më simpatike dhe më shumë e mprehtë në përballjen televizive.
Në lojë është e ardhmja e Gjermanisë, ekonomisë më të madhe të Europës dhe shtetit më të populluar, pas lidershipit të qëndrueshëm 16-vjeçar të Angela Merkel. Merkel, e ashtuquajtur “Zonja e Hekurt”, ka në plan të tërhiqet menjëherë pas zgjedhjeve, duke kaluar pjesën e mbetur të jetës larg zhvillimeve politike.
