Një ngjarje e rëndë ka ndodhur në botën e futbollit shqiptar, nga ku mësohet se ka humbur jetën fizioterapisti i Kombëtares Ylli Mihali.
55-vjeçari prej kohësh ishte në gjendje të rëndë nga koronavirusi dhe nuk ka mundur ta fitojë luftën me të.
Ky lajm është bërë publik nga Presidenti i FSHF-së Armand Duka, përmes një postimi në rrjetet sociale ku i shpreh ngushëllimet familjes së Mihalit.
“Pak minuta më parë u njoha me lajmin e kobshëm se Ylli Mihali, njeriu i mirë, fjalë pak, u nda nga jeta pas një betejë të gjatë e stërmunduese me Covid-19.
Ky është një moment i vështirë për të gjithë futbollin shqiptar, që e njoftoi dhe e dashuroi aq shumë Yllin, që emrin e reflektonte në ҫdo hap dhe moment të jetës së tij. Një fizioterapist dhe një njeri i jashtëzakonshëm që shërbeu për 27 vite pranë ekipit tonë Kombëtar, pranë klubit të tij Tiranës, pranë sportistëve në vështirësi, duke qenë pranë tyre në ҫdo situatë.
Humori, dashuria për njerëzit, dhembshuria e Yllit do të na mungojnë. Në këtë moment të vështirë për familjen e tij, miqtë e tij të shumtë, lutemi që shpirti i tij të prehet në paqe.
Lamtumirë Yll, do të të kujtojmë gjithmonë me dashuri!”-shkruan Duka.
Ndërkohë rikujtojmë se para fillimit të ndeshjes me San Marinon, djemtë Kombëtares kishin veshur bluza ku i uronin shërim të shpejtë Mihalit./Gijotina.com
