Drejtoria e Tatimeve ka bërë paralajmërim të fortë për bizneset në vend pas konstatimit se në disa sektorë po “lulëzon” evazioni fiskal.
Duke parë që në vitin 2020 evazioni fiskal në ekonomi u rrit ndjeshëm, Administrata vendosi të shtojë inspektimet në terren ku u zbuluan një sërë shkeljesh nga biznese të fushave të ndryshme. Sipas të dhënave, nivelin më të lartë të evazionit e regjistron sektori i ndërtimit. Tatimet bëjnë me dije se, bizneset në këtë sektor mbajnë shumë punonjës informalë edhe në shumë raste nuk deklarojnë të ardhurat e tyre, prandaj është vendosur që në vijim ky sektor do të jetë në qendër të kontrolleve të përforcuara.
“Sektori i ndërtimit do të jetë në shënjestrën e tatimeve në luftën ndaj evazionit fiskal gjatë këtij vit. Tatimet kanë vënë re se, të ardhurat që lidhen me ndërtime të tatueshme deklarohen në mënyrë të pasaktë. Ndërkohë, blerjet që deklarohen se, lidhen me ndërtimet e përjashtuara devijohen në ndërtimet e tatueshme. Tatimet do të bëjnë vlerësim risku të të gjithë tatimpaguesve në sektorin e ndërtimit, teksa kontrollet do të ushtrohen te kompanitë me risk të lartë”, thuhet në raport.
Sipas Tatimeve, bizneset në njësitë e shërbimeve, bare, kafe, restorante dhe hotele historikisht paraqiten problematike për evazionin fiskal. Skema që ata përdorin fillon me nëndeklarimin e të ardhurave, nuk regjistrojnë punonjësit, pagat dhe shpenzimet. Gjithashtu, kasat fiskale nuk përdoren, kuponët nuk lëshohen. Tatimet pohojnë se evazioni në këto biznese do të luftohet, duke u bazuar në normat e të ardhurave, blerjeve, shpenzimeve, numrin e punonjësve dhe nivelet e pagave.
Në këtë kuadër tatimet tregojnë se kanë shtuar kontrollet në terren dhe për shkelje të tilla nuk do të ketë asnjë tolerim, madje bëhet e qartë që nuk do të ketë shtyrje të penaliteteve. Në fokus të kontrolleve do të jenë edhe personat e pasur, pasi shumë prej tyre deklarojnë si burim të ardhurash vetëm rrogën, por në fakt pasuria e tyre e lartë nuk mund të justifikohet vetëm me nivelin e pagave.
E.H/ gijotina.com/
