Masat anticovid të vendosura në Kosovë dy ditë më parë pengojnë partitë politike të bëjnë fushatë zgjedhore për zgjedhjet e 17 tetorit. Aleanca për Ardhmërinë e Kosovës njoftoi sot se, do të zhvillojë vetëm 5 ditë fushatë ndërsa në ditët e tjera do zbatojnë modelin e fushatës digjitale.
Lajmin e bëri të ditur Ramush Haradinaj përmes një postimi në Facebook.
“Duke pasur parasysh situatën e rëndë epidemiologjike me Covid-19, Aleanca për Ardhmërinë e Kosovës, ka vendosur që Fushatën konvencionale për zgjedhjet lokale Tetor 2021, ta kufizojë në 5 ditë. Po ashtu jemi të përcaktuar që edhe këtë afat 5 ditor të fushatës, ta zhvillojmë në përputhje të plotë me kriteret dhe rekomandimet për parandalimin e përhapjes së virusit.
Të nderuar qytetarë, struktura e simpatizantë të AAK-së, do të përpiqemi që duke filluar nga nesër, të gjejmë mënyra alternative të komunikimit dhe të shpalosim programin dhe objektivat tona për zgjedhjet e 17 Tetorit”, tha ai.
Haradinaj u shpreh se duhej të gjenin alternativën që është në të mirë të të gjithëve.
gijotina.com
