Operacioni “Bregdeti Ynë”, i iniciuar për prishjen e ndërtimeve pa leje në zonat rreth bregdetit shqiptar, ka vijuar me shembjen e objekteve në Dhërmi.
Lajmin e ka bërë të ditur ministri Bledi Çuçi përmes një postimi në Facebook, teksa shkruan se operacioni do të vijojë dhe askush nuk do të tolerohet.
“Ajo që nisëm në muajin qershor nuk ka për të qenë thjesht një aksion. Kush e ka menduar kështu, gabohet rëndë. Kjo është një punë që do të vazhdojë me vullnetin tonë të plotë për të mos toleruar askënd që zapton e ndërton ku të mundet. Nisi ky operacion në zonat bregdetare, por IKMT dhe Policia e Shtetit do të jenë kudo tjetër në territorin e vendit ku po tentohet apo janë ngritur objekte pa leje ose që janë në tejkalim të lejes së miratuar”, shkruan Çuçi.
Bledi Çuçi është konfirmuar në detyrë si ministër i Brendshëm për mandatin e tretë të qeverisë Rama, ku nesër pritet të bëhet votimi i ministrave.
