Ditën e sotme futet në fuqi vendimi që e lidh Shqipërinë me sistemin europian dhe certifikatat e Covidit që do të lëshojë, duke u pranuar në BE me të njëjtat kushte si pasaportat dixhitale të bllokut.
Lajmin e bëri të ditur Komisioneri i Drejtësisë, Didier Reynders teksa tha se qytetarët tani mund të lëvizin të lirë, dhe transporti të lulëzojë sërish.
“Gjatë verës, ne kemi parë që qytetarët janë të aftë për të udhëtuar të sigurt falë certifikatës dixhitale europiane ndaj Covid. Është një situatë fitoreje: qytetarët mund të shijojnë të drejtën e lëvizjes së lirë dhe bizneset si dhe sektori i transportit mund të fillojë të lulëzojë sërish pas humbjeve të muajve të kaluar. Unë mirëpres më shumë shtete jashtë BE që po i bashkohen sistemit tonë të suksesshëm,”- tha Komisioneri i Drejtësisë, Didier Reynders.
Shtatë vendime të reja u morën lidhur me certifikatat e Covid të lëshuara nga Shqipëria, Andorra, ishujt Faroe, Izraeli, Monako, Maroku e Panamaja. Këto shtete e territore, thuhej në njoftimin e bllokut, kanë pranuar në të njëjtën kohë certifikatën dixhitale të BE-së për udhëtim drejt tyre nga vendet e unionit. D.L/Gijotina.com
