Protestës së mbajtur paqësisht ditën e sotme në Fier për vrasjen e Sabrina Bengajt nga bashkëshorti i saj, i është bashkuar edhe Robert Zhezha. Ky i fundit është vëllai i Liljana Zhezhës, e cila u vra po nga bashkëshorti i saj 5 vite me parë.
Në një prononcim për mediat, ai u shpreh se dënimi i duhur për këtë kategori do të ishte dënimi me vdekje.
Ai u shpreh se kjo mund t’i pakësoj këto raste. Roberti gjithashtu tha se për dy fëmijët jetim që i la motra kujdeset ai dhe pas vrasjes së saj, ai është kërcënuar shumë herë nga bashkëshorti i saj, edhe pse është në burg.
“Është vrarë nga ish-bashkëshorti, nga krimineli dhe fëmijët e time motër i kam unë. Janë edhe ata viktima. Megjithatë unë mendoj se një nga arsyet që mund të pakësohet, eliminohet këto është rivendosja e dënimit me vdekje. Sepse 90% e këtyre mostrave, pasi bëjnë krimin mendojnë vetëm për vete. E kemi të vështirë t’i rrisim dy fëmijët, madje marrim dhe kërcënime nga krimineli që më ka vrarë motrën. Shoqëria shqiptare është indiferente ndaj këtyre gjërave, institucionet e shtetit janë pothuajse inekzistente. Unë kam bërë denoncime e janë mbyllur të dyja nga prokuroria e shtetit. I kam denoncuar në polici dhe janë mbyllur të dyja, jemi lodhur nëpër sallat e gjyqeve. E them edhe njëherë rivendosja e dënimit me vdekje mund t’i pakësojë kriminelët”, tha ai
Ndërkaq kujtojmë rastin e Liljana Zhezhës, e cila u flak nga dritarja e tualetit prej bashkëshortit të saj. Vrasje kjo po aq brutale sa ajo e Sabrinës, e cila ka bërë që në protestë të mblidhen edhe njerëz të tjerë që kanë kaluar situata të ngjashme.
