Kryeministri i Maqedonisë së Veriut, Zoran Zaev në konferencën për media pas mbledhjes së dy qeverive ka thënë se me kryeministrin Kurti nuk ndajnë opinionin e njëjtë për “Open Balkan”, por kjo pengon bashkëpunimin ndërshtetëror.
“Sa i përket “Open Balkan”, kemi opinione të ndryshme por kjo nuk na pengon në bashkëpunimin bilateral mes dy vendeve. Unë mund të them se Kosova është e pavarur dhe ka qëndrimet e veta”, tha Zaev para gazetarëve.
Ndërkaq, sa i përket iniciativës “Ballkani i Hapur”, Kryeministri Kurti ripërsëriti atë që tha në Tiranë para dy ditësh, se vetëm iniciativat rajonale që kanë BE-në brenda përkrahen nga Kosova.
“Ne dëshirojmë sa më shumë bashkëpunim dhe zbatim të marrëveshjeve në aspektin bilateral me Maqedoninë e Veriut, jemi të orientuar nga e ardhmja dhe për ne e ardhmja është Bashkimi Evropian. Pra BE është fati ynë, prandaj edhe si republikë e Kosovës ne mbështesim iniciativat rajonale që janë nga BE. Asnjëra nga marrëveshjet e nënshkruara nuk mund të cenohen në zbatim pavarësisht dallimeve që mund të kemi”, tha Kurti.
Kurti foli edhe për marrëveshjet e nënshkruara mes dy qeverive, ku përfshihet bashkëpunimi në ekonomi, bujqësi, turizëm, siguri, kontrollin e transportit hekurudhor, lidhjen e Brezovicës me Kodrën e Diellit, dhe bashkëpunimi ndërkufitar.
