Seanca e së enjtes në Gjykatën e Hagës ndaj ish-kreut të UÇK Salih Mustafës, është anuluar pasi deklaratat hyrëse ishin të shkurtra.
“Meqenëse deklaratat hyrëse ishin më të shkurtra sa pritej, gjykatësit kanë vendosur se nuk nevojitet të mbahet edhe seanca e parashikuar për të enjten”, thuhet në përgjigjen e DHSK-së.
Ditën e sotme ishte parashikuar që në sallën e gjyqit të Dhomave të Specializuara të Kosovës në Hagë, të vazhdonte gjykimi për krime lufte ndaj ish-pjesëtarit të Ushtrisë Çlirimtare të Kosovës (UÇK), Salih Mustafa, mirëpo kjo seancë është anuluar.
Ish-kreu i UÇK akuzohet në kuadër të formave të ndryshme të përgjegjësisë penale, për ndalim arbitrar, trajtim mizor, torturë dhe vrasje të paligjshme si krime lufte të kryera në kontekstin e konfliktit të armatosur jo ndërkombëtar në Kosovë, ose në lidhje me atë konflikt.
Në tetor të vitit 2020, Gjykata Speciale për hetimin e krimeve të kryera gjatë luftës së Kosovës, konfirmoi aktakuzën ndaj Hashim Thaçit, Kadri Veselit, Rexhep Selimit, Salih Mustafës dhe Jakup Krasniqit, nën dyshime për kryerjen e krimeve të luftës në Kosovë në vitet 1998 dhe 1999.
