Partia Demokratike ke reaguar lidhur me ngjarjen e rëndë në Bulqizë, ku prej tre ditësh minatori Muharrem Plaku është bllokuar brenda në minierë.
Deputetja Dhurata Çupi shkruan në Facebook, se lutet që 61-vjeçari të dalë gjallë nga nëntoka, teksa shton se gjatë 8 viteve dhjetëra minatorë kanë humbur jetën për shkak të abuzimeve të qeverisë me pasurinë e nëntokës.
“Lutemi që të dalë nga nëntoka e pasur që mban mbi tokë mijëra të varfër për shkak të keqqeverisjes, abuzimit dhe korrupsionit masiv me pasurinë Kombëtare. Gjatë 8 viteve që kaluara janë me dhjetëra minatorë që kanë humbur jetën, që janë plagosur në miniera për shkak të babëzisë së pa fre, për shkak të abuzimeve me pasurinë e nëntokës”.
Sipas saj, minatorët janë braktisur si asnjëherë më parë, ndërsa lista e borxheve të tyre, shtohet përditë.
“Korrupsioni me lejet e shfrytëzimit të minierave fillon në Tiranë, në zyrat me vula shtetërore dhe mbaron në zgavrën e korrupsionit në Bulqizë. Minatorët janë të braktisur si asnjë herë më parë. Familjet që kanë humbur kryefamiljarin në galeritë e vdekjes janë në hall të madh. Mbijetojnë në varfëri. Lista e borxheve të familjeve të minatorëve shtohet nga dita në ditë”.
Ndër të tjera, deputetja shkruan se qeveria ka hequr dorë nga përgjegjësia sociale për t’ju siguruar minatorëve kushte pune të sigurta, dhe se në programin e qeverisë nuk kishte asgjë për ta, ashtu siç nuk kishte për 8 vite më parë.
Për ngjarjen e rëndë reagoi ditën e djeshme dhe sindikata e minatorëve, të cilët akuzojnë strukturat shtetërore për angazhim qesharak në gjetjen dhe shpëtimin e Muharrem Plakut.
Sindikata hedh akuza të drejtpërdrejta për organet shtetërore të cilat janë përqendruar në qeverinë dhe parlamentin e ri duke mos i kushtuar vëmendjen e duhur zhdukjes së minatorit.
“Shteti dhe mobilizimi i institucioneve shtetërore ka qenë qesharak, edhe pse kanë kaluar më shumë se 3 ditë. E gjithë vëmendja është përqendruar te parlamenti i ri i padrejtësive të vjetra. Asnjë fjalë nuk kanë thënë për minatorin Muharrem Plaku. Bëjmë thirrje që shteti të kthejë sytë nga Bulqiza dhe të përqendrojë të gjitha forcat për nxjerrjen e shokut tonë nga nëntoka. Jeta jonë duhet të jetë më e rëndësishme se fitimi i pronarëve dhe pallavrat e politikanëve!”
Minatori Muharrem Plaku me detyrë zjarrmëtar, ka mbetur në galeri prej orës 12:00 të 15 shtatorit dhe ende nuk dihet fati i tij. Ekipi i Avari Shpëtimit të Minierave nuk ka mundur akoma të nxjerrë akoma minatorin që mbeti i bllokuar nga shembja e galerisë së kromit në Bulqizë.
