Ish-kryeministri Sali Berisha do të mbajë takimin e radhës me demokratët e bazës në qytetin e Fierit. Pas takimit me demokratët në Tiranë, Berisha ka njoftuar më herët në Facebook, se ka vendosur që takimin e radhës ta zhvillojë në orën 18:00 të martën, pranë ish-Universitetit “Ufo”.
Pas përjashtimit nga grupi parlamentar i PD-së, Berisha nën slogani “Foltorja për një Parti Demokratike më të bashkuar, më të fortë, më të hapur” ka nisur një aksion, duke paralajmëruar një referendum me 1500 firma të Kuvendit Kombëtar.
Në takimin që ish-kryeministri pati në Tiranë, ai e ka cilësuar Bashën si një “broken lider” që nuk e sjell dot Partinë Demokratike në pushtet. Me vendimin për ta përjashtuar nga grupi parlamentar, ish-kryeministri tha se Basha i ka futur një thikë pas shpine demokratëve.
Berisha u përjashtua më 9 shtator 2021 nga grupi parlamentar i Partisë Demokratike, pas presionit që SHBA ushtruan mbi Lulzim Bashës. Basha dhe Berisha kanë hyrë tashmë në një përplasje me njëri-tjetrin ku ish-kryeministri e akuzon për shitje të interesave të PD, përfitime personale dhe bashkëpunim me Edi Ramën.
