Komisioni i Jashtëm i Vlerësimit ka konfirmuar në detyrë Erjana Vangjel Pjetrin me funksion specialiste në Sektorin e Sigurisë së Personelit, në Drejtorinë e Analizës dhe Kartotekës pranë Shërbimit për Çështjet e Brendshme dhe Ankesat në Ministrinë e Brendshme.
Lajmi bëhet i ditur nga Komisioni i Jashtëm i Vlerësimit, i cili njofton sot se u zhvillua seanca dëgjimore publike për subjektin e vlerësimit kalimtar, Erjana Vangjel Pjetri me funksion specialiste në Sektorin e Sigurisë së Personelit në MB.
Në përfundim të seancës, trupa vlerësuese e përbërë nga Nertila Sadedini, Artur Baku, Ledian Rusta vendosi konfirmimin në detyrë të Erjana Pjetrit.
Vettingu në polici, një proces i stërzgjatur do të fokusohet fillimisht tek vettingu i SHÇBA-së si strukturë që do të fusë në sitë më pas të gjithë efektivët e nivelit bazë në policinë e shtetit.
Për procesin e Vettingut në polici janë lënë rekomandime edhe nga Komisioni Europian në raportin e GRECO ku thuhej se ky proces duhet të zëvendësohet me një mekanizëm për vlerësimin e integritetit të personelit gjatë karrierës së tyre dhe për qëllimin e ngritjes në detyrë.
