Policia ka vënë në pranga një person dhe është duke hetuar një tjetër pasi dyshohet të jenë përgjegjës për ngjarjen e ndodhur disa ditë më parë në minierën e Bulqizës ku një aksident, izoloi minatorin Muharrem Plaku trupi i të cilit sot u gjend i pajetë. Bëhet fjalë për të arrestuarin e identifikuar me emrin Veli Losha 61 vjeç, banues në Bulqizë, me detyrë Drejtues teknik. Ndërsa në hetim për këtë ngjarje do të jetë personi i identifikuar me emrin Saba Hasani 54 vjeç, banues në Bulqizë, me detyrë Teknik miniere.
Personat në fjalë kanë patur detyrimin ligjor për kontrollin e vazhdueshëm të gjendjes teknike të galerisë, ku si pasojë e neglizhencës së tyre, mesditën e datës 15.09.2021, në një nga nënkatet e një subjekti minerar, është shembur një masiv materiali dhe për pasojë ka humbur jetën 60 vjeçari punëtor në minierë.
E për këtë arsye pritet të përballen me akuzën për veprën penale “Shkelja e rregullave të mbrojtjes në punë”.
