Agjencia e Prokurimit Publik iu bën thirrje institucioneve që pasi të kenë shkruar kontratën me një operator, duhet të përcaktojnë dhe planin mbi të cilin do të zbatohet kjo kontratë. Në këtë kuadër, APP sqaron se me përcaktimin e planit, palët kontraktore nuk kanë asnjë të drejtë të ndryshojnë të dhënat apo kushtet e kontratës.
APP thekson se kjo mund të ndodh vetëm atëherë kur operatori kërkon të ofrojë shërbime të tjera pa ndryshuar çmimin, por edhe në këto raste çdo ndryshim duhet të raportohet. Agjencia iu kërkon institucioneve që të zbatojnë me përpikmëri rregullat e paraqitura në udhëzimin e publikuar pak javë më parë për këtë çështje. Sipas APP, Ky udhëzim u vjen në ndihmë autoriteteve kontraktore për hartimin e planit të zbatimit të kontratës si dhe për të lehtësuar administrimin e dokumentacionit me qëllim sigurimin e eficensës gjatë zbatimit të kontratës.
“Autoritetet/entet kontraktore pasi nënshkruajnë kontratën me operatorin/ret ekonomik/e fitues, në përfundim të procedurës së prokurimit për pune/mallra ose shërbime, hartojnë planin e zbatimit të kontratës në respektim të parashikimeve ligjore të LPP-se dhe legjislacionit përkatës, në fuqi. Plani i zbatimit të kontratës, përfshin në veçanti çështjet organizative, afatet e përcaktuara, çështjet ekonomike, kushtet specifike teknike, personin/personat përgjegjës për ndjekjen e zbatimit të kontratës, si dhe çdo çështje dhe informacion tjetër në përputhje më kushtet kontraktuale dhe legjislacionin në fuqi”, përcakton udhëzimi.
Në përfundim, APP njofton se do të merren masa të menjëhershme ndaj institucioneve nëse nuk hartojnë planin për kontratën, apo e shkelin atë gjatë rrugës.
E.H /gijotina.com/
