Një heshtje zie ka zaptuar në fshatin Gajush të Lezhës ku ndodhi dhe tragjedia e rëndë që i mori jetën 4 pjesëtarëve të familjes Gjoka. Shumica e banorëve janë të prekur nga ngjarja e rëndë dhe nuk gjejnë fjalë apo komente.
“Ishin familje shumë e edukuar, më erdhi shumë keq sidomos për djalin”, flasin banorët për familjen Gjoka
Dëshmia e këtyre të fundit dëshmon se familja Gjoka gëzonte respektin e kujtdo në fshat dhe fatkeqesia i ka lënë të shokuar. Një banor thotë se ata ktheheshin në Lezhë vetëm për hatër të prindërve të moshuar të kryefamiljarit, Arben Gjokës dhe ishin një familje shumë e edukuar.
“Ishin familje shume e edukuar. Ikën njëherë në Itali por u kthyen se kishin pleqtë, vetëm për ata u kthyen. Patën marrë një lokal në Velipojë dhe u ndodhi çfarë u ndodhi. Zoti u dhëntë paqe”, thotë ai.
Ngjarja
Në 3 korrik Alketa me tre fëmijët shkuan për të hapur hotelin, por bombola e gazit shpërtheu aksidentalisht dhe të katër mbetën të plagosur rëndë. Edhe pse u dërguan për mjekim të specializuar në Itali ku jeton dhe kryefamiljari Arben Gjoka, fatkeqësisht nuk mundën t’i mbijetojnë plagëve të marra.
Të parat u ndanë nga jeta vajzat Daniela dhe Klarisa, 19 dhe 15 vjeç, trupat e të cilave prehen në Shqipëri. Kurse nëna e tyre Alketa dhe vellai Enriko, 12 vjeçar u ndanë nga jeta më 16 dhe 20 shtator, trupat e të cilëve ndodhen ende në Itali.
