Përfaqësuesi i Lartë për Punët e Jashtme dhe Politikën e Sigurisë, Josep Borrell organizoi një darkë joformale me udhëheqësit e Ballkanit Perëndimor mbrëmjen e djeshme në Nju Jork.
Ky ishte takimi i dytë i tillë i organizuar nga Borell, pas darkës joformale në Bruksel në maj. Përfaqësuesi i Lartë dhe udhëheqësit e Ballkanit Perëndimor patën një takim mbi situatën në rajon dhe marrëdhëniet BE-Ballkani Perëndimor. Gjithashtu u fol dhe për Samitin që pritet të mbahet muajin e ardhshëm BE-BP.
Mes të tjerash, Borrell nënvizoi nevojën për një angazhim të fortë si nga partnerët e Ballkanit Perëndimor, ashtu edhe nga Bashkimi Evropian dhe shtetet anëtare, për të kapërcyer dinamikat aktuale dhe për të çuar përpara procesin e integrimit.
Në këtë takim morën pjesë, presidenti i Malit të Zi Milo Đukanović, presidenti i Maqedonisë së Veriut Stevo Pendarovski, kryetari i Presidencës së Bosnjës dhe Hercegovinës Željko Komšić, presidentja e Kosovës Vjosa Osmani, kryeministri Edi Rama si dhe ministri i Jashtëm i Serbisë Nikola Selakoviç.
Prej ditësh, kryeministri Rama ndodhet në New York ku pritet të marrë pjesë në një takim të organizuar nga Asambleja e Përgjithshme e Organizatës për Kombet e Bashkuara me temë “Kuptimi i Paqes dhe Qëndrueshmërisë në shekullin e 21-të”.
