Është shtyrë sërish seanca mes deputetes së PD, Grida Duma dhe kryetarit të Bashkisë së Tiranës, Erion Veliaj, pasi ky i fundit nuk është paraqitur për pajtim.
Para dyerve të gjykatës, Duma është shprehur se e dinte që Veliaj nuk do të paraqitej, pasi e ka të vështirë përballjen me të vërtetën.
“Nuk ka për t’u paraqitur, se përballja me të vërtetën e ka të vështirë. Do të vijojë nuk dhamë dakordësi për pajtimin. Ju bëj me dije se nuk është më çështja ime personale, herë pas here është politike. E vërteta duhet të kthehet në institucion. Gënjejmë, premtojnë, japim mashtrine dhe ia mpinë shqisat të gjithëve se çdo gjë e gënjeshtër fiton në këtë vend. Më takon mua të bëjë një betejë. Kjo betejë nis nga vlera e fjalës, vërtetësia e saj. Kur njeriu beson fjalën, vepron mbi atë. Ata që besojnë gënjeshtra, bëjnë veprimin e gabuar. Ata që kanë lindur në liri, e dinë peshën e saj”, tha Duma.
Kjo çështje kaloi nga gjykata e Tiranës në Gjykatën e Posaçme për shkak të cilësisë së personit të rëndësisë së lartë, që është kryebashkiaku i Tiranës, Erion Veliaj.
Kujtojmë se, në datën 24 mars 2021, deputetja e zgjedhur e PD-së Grida Duma ka paditur në gjykatë kryebashkiakun Veliajn për shpifje ndaj saj.
Duma u shpreh në një deklaratë për media asokohe se përgjimet e publikuara nga media, ku bënin pjesë anëtarët e klanit mafioz “Ndrnagheta”, konfirmojnë sipas saj, se Erion Veliaj dhe Edi Rama po e përdorin Tiranën si lavatriçe për paratë e pista, të mafias dhe krimit të organizuar, duke marrë 20 % të fitimit.
Veliaj përmes një reagimi zyrtar, theksoi se dëshirat e disa mafiozëve italianë për të bërë plane biznesi për Shqipërinë dhe dëshirat e PD-së që këto plane të jenë të vërteta, janë bashkuar në gojën e një trafikanteje të njohur apartamentesh.
Deputetja i konsideroi akuzat e tij si shpifje të pabazuara dhe që nuk mund të argumentohen apo faktohen.
