Pas vendimit të marrë nga qeveria e Kosovës për reciprocitetin e targave, rikthimi i dialogut mes kësaj të fundit dhe Serbisë duket i vështirë.
Para se të dyja palët të ulen në tavolinë për të negociuar, duhet që secila prej tyre të pranojë kushtet e vendosura nga pala tjetër. Sipas mediave fqinje, presidenti serb Alexandar Vuçiç i ka paraqitur katër kushte Kosovës për t’u kthyer në dialog, ndërsa Albin Kurti, ka vetëm një kusht, atë të reciprocitetit të targave.
Vuçiç kërkoi që Bashkimi Evropian të tregojë nëse vijon të jetë në fuqi marrëveshja e Brukselit apo jo, që policët e armatosur të tërhiqen nga veriu, që vendimi kundër Ivan Todosijeviqit të anulohet dhe që të jepen licensa për dy kompanitë serbe të energjisë elektrike, shkruan Novosti, medium i afërt me kreun e shtetit serb.
Serbia kërkon formimin e Asociacionit të komunave me shumicë serbe, kështu Vuçiç e ka pyetur Bashkimin Evropian nëse marrëveshja është ende e vlefshme. Kjo marrëveshje u ratifikua edhe nga Kuvendi i Kosovës. Megjithatë, Gjykata Kushtetuese kishte gjetur shkelje në disa pika të marrëveshjes për formimin e Asociacionit.
Beogradi po ashtu ka kërkuar vazhdimisht licensimin e dy kompanive serbe, për furnizimin me energji elektrike në veri të Kosovës.
Serbinë e irriton edhe vendimi i Gjykatës së Apelit në Kosovë e cila e ka konfirmuar aktgjykimin e Gjykatës Themelore në Prishtinë, sipas të cilit deputeti i Kuvendit të Kosovës nga Lista Serbe, Ivan Todosijeviq, ishte dënuar me dy vjet burg nën akuzat për nxitje të urrejtjes, përçarjes ose mosdurimit kombëtar, racor, fetar apo etnik, pasi e quajti trillim masakrën e Reçakut.
Kryeministri i Kosovës, Albin Kurti tha të hënën në Kuvend se vendosja e targave të Republikës së Kosovës për të gjitha automjetet me tabela të Serbisë nuk ka qenë dëshirë e tij, por imponim nga pala tjetër.
Kreu i Qeverisë së Kosovës tha dje se është i gatshëm që ta heqë masën e reciprocitet për targat në rast se edhe Serbia zotohet se do ta bëjë të njëjtën gjë kundrejt Kosovës.
