Nënkryetarja e Partisë Demokratike Jorida Tabaku në një intervistë për mediat, foli në lidhje me situatën e brendshme në PD dhe përjashtimin e Sali Berishës. Ajo u shpreh se vendimi pezullon Berishën derisa çështja e tij të zgjidhet që edhe PD të mos cenohet nga kjo situatë.
Ajo foli edhe për lëvizjen e brendshme në PD të nisur nga vetë Berisha dhe të mbështetur nga disa deputetë, një prej të cilëve edhe Flamur Noka i cili tha sot se Kuvendi duhet të mblidhet për të shkarkuar Bashën. Tabaku u shpreh se ndjen keqardhje për këto deklarata duke i quajtur ato emocionale.
“Ndjej keqardhje kur dëgjoj deklarata që shkojnë në nivel emocional. Nuk dua t’i jap rëndësi kësaj sepse nuk më duket që ky janë thelbi i diskutimit. Nuk ka asnjë çedim që e keqja më e madhe sot është Edi Rama. Diskutimi kryesor që ne kemi me qytetarët është e nesërmja dhe bërja e PD fituese. Ndërkohë që unë po prisja këtu ne dëgjuam diskutimet në PS e Shkodrës. Një ndarje pushteti në tepsi. Debati bën mirë dhe e forcon PD-në. Qëllimi i përbashkët sot është largimi i Edi Ramës. Vendimi që u mor pas diskutimesh dhe negociatash. Është bërë maksimumi që të kishte një zgjidhje tjetër” – është shprehur Tabaku.
Pyetur nëse ky vendim duhet të ishte marrë nga strukturat e PD, Tabaku theksoi se nuk mund të pyeten strukturat për çdo vendim politik që në këtë rast i takonte kryetarit të votëbesuar pak muaj më parë, Lulzim Basha.
