Rruga që çon në vendkalimet kufitare me Serbinë, Bërnjak dhe Jarinë, vazhdojnë të mbahen të bllokuara prej pesë ditësh nga serbët.
Ata janë duke protestuar kundër vendimit të Qeverisë së Kosovës për masën e reciprocitet për targat e automjeteve të Serbisë, që ka filluar të aplikohet nga dita e hënë.
Serbët kanë bllokuar rrugët me kamionë e vetura, duke pamundësuar lëvizjen e lirë në këtë anë, teksa në vazhdimësi të saj kanë ngritur edhe tenda.
Përveç bllokadës së rrugës, situata deri tani është e qetë dhe nuk është raportuar për ndonjë incident. Pak metra larg pikës doganore janë duke qëndruar edhe Njësia Speciale e Kosovës. Ministria e Punëve të Brendshme ka vlerësuar se situata është e qetë deri tani, teksa u ka bërë thirrje serbëve të mos bllokojnë rrugët.
Po ashtu, kryeministri i Kosovës, Albin Kurti ka ritheksuar se vendimi për reciprocitet me targa është i drejtë dhe se nuk i bën dëm askujt. Siç ka deklaruar Kurti, Njësia Speciale po qëndron në veri për t’i mbrojtur policët kufitar dhe vendkalimet kufitare.
Kujtojmë që qeveria e Kosovës, ditën e hënë ka vendosur për aplikimin e masës së reciprocitetit për Serbinë, dhe se veturave që hyjnë nga ky shtet t’iu vendosen targa të përkohshme.
