Ish-arbitri Davide Pekoreli tërhoqi vëmendjen e opinionit shqiptar pasi u raportua i vdekur në muajin janar teksa makina e tij u gjend i djegur në Pukë.
Disa ditë më parë ish-gjyqtari u shfaq në detin Tirren pranë ishullit Montekristo.
Ai pretendon se ndodhej atje në kërkim të thesarit, plot tri arka me nga 250 kg monedha ari secila. Ai thotë se thesarin e gjetur do e ndante me personin që e kishte ndihmuar, një prift shqiptar, identiteti i të cilit nuk bëhet i ditur. Kështu të paktën ka deklaruar biznesmeni në një intervistë të dhënë në “La Vita Live”, në “RAI 1”.
“Situata ime ekonomike ishte dramatike, në atë moment vendosa të bëja vetëvrasje. Por para se të ndërmerrja këtë hap shkova dhe u rrëfeva te një prift, që më bindi të mos e bëja, por në vend të kësaj të simuloja vdekjen time. Ishte ai që më tha për mundësinë e eshtrave (të vjedhura).
Më tha: ‘le t’i fusim në makinë dhe t’i vëmë zjarrin’. Unë kurrë nuk do e zbuloj emrin e priftit shqiptar, pasi ai është personi që më ka shpëtuar jetën. Gjeta thesarin e San Mamilianos, ato janë tri arka me 250 kilogramë monedha ari të pastra prej pesë gramësh secila, ku gjysmën e tyre e kam ndarë me priftin.
I kam të gjitha të dokumentuara, fotografitë i kam dërguar në Prokurorinë në Peruxhia”, ka thënë 45- vjeçari për “RAI 1”.
