Deputeti i Partisë Demokratike, Agron Gjekmarkaj ka komentuar deklaratat që ambasadorja e SHBA-ve, Yuri Kim dha pas takimit me kreun e PD, Lulzim Basha.
Gjekmarkaj shprehet se mesazhet që dha diplomatja amerikane ishin të forta, të pazakonte dhe shpresëdhënëse për Partinë Demokratike, ndërsa thekson se ishin një lajm i keq për kryeministrin Edi Rama, pushtetin e të cilit e krahasoi me atë të ish-kryeministrit maqedonas, Nikola Gruevski.
Duke iu referuar vendimit të Bashës që përjashtoi Sali Berishën nga grupi parlamentar, Gjekmarkaj shprehet se nuk kishte një tjetër shteg nga ku mund të kalonte PD dhe Kryetari i saj.
“SHBA nëpërmjet zërit të Zonjës Kim deklaruan mbështetje për PD dhe vendimet e Bashës madje dhe gatishmëri për të festuar fitoren e PD në zgjedhje. PD, trupa drejtuese e kryesisht anëtarësia e saj duhet të përballen me të vërteten e cila është e dhimbshme por dhe e vetme! Nuk ka dy të vërteta për një çështje. Nuk kishte një tjetër shteg nga ku mund të kalonte PD dhe Kryetari i saj. Ambasada e SHBA ktheu mbrapsht çdo aludim për dëmtim të demokracisë në PD me ndërhyrjet e saj duke e konsideruar atë fyes” – thotë Gjekmarkaj.
Një përgjigje, deputeti demokrat kishte edhe për kritikët e Bashës, i cili ka thënë që po mblidhen e flasin por që nuk kanë këllqe që të komentojnë vendimin e SHBA-së.
“Mblidhen e flasin duke mos zënë me gojë vendimin ultimativ të SHBA për Sali Berishen të cilin nuk ka këllqe askush ta komentojë. Sido që na është dukur i gabuar dhe i padrejtë ai është vendimi i tyre të cilin ne nuk e negociojnë dot! Ai mund të refuzohet vetëm me koston e shndërrimit të PD në një parti antiamerikanë!”
Në fund Gjekmarkaj shprehet se veprimi i selisë blu nuk është servilizëm apo nënshtrim, por interes madhor i Partisë Demokratike dhe shumë shpejtë do kalohet kjo “traumë”, duke i dhënë vendit ndryshimin.
