Kryeministri Edi Rama do të vizitojë nesër Kosovën. Në këtë takim do të jenë të pranishëm edhe anëtarët e kabinetit të tij.
Kreu i qeverisë do të realizojë vizitën një ditore në Prishtinë, e cila vjen menjëherë pas udhëtimit në SHBA.
Vizita e kryeministrit Rama vjen pas ftesës së kryeministrit të Kosovës, Albin Kurti.
Menjëherë pasi Rama u dekretua si kryeministër, Albin Kurti e uroi dhe e ftoi Ramën për një vizitë. Ndërkohë, kryeministri shqiptar iu përgjigj menjëherë ftesës dhe i tha Kurtit se do ta vizitonte sapo të kthehej nga SHBA-ja.
Në këtë takim do të diskutohet rreth përgatitjeve të një mbledhje të dy qeverive, Kosovës dhe Shqipërisë.
Kohët e fundit, raporti mes Ramës dhe Kurtit ka qenë mjaft i ftohtë, shkak janë bërë diskutimet dhe qëndrimet për nismën “Open Balkan”, ku shpesh herë mes dy krerëve të qeverive ka pasur edhe “kunja”.
Kurti ka thënë se kjo nismë është kundër interesave të shtetit që drejton, duke kërkuar më shumë bashkëpunim midis shteteve shqiptare.
Ndërsa, shefi i qeverisë shqiptare është shprehur se Kosova nuk mund t’i japë leksione Shqipërisë dhe se duhet të respektojë vendimet e saj.
Kjo vizitë vjen në një kohë tensionesh për Kosovën. Prej ditës së hënë, dy pikat kufitare që lidhin Kosovën me Serbinë, Janirje dhe Bërnjak janë të bllokuara.
Rikujtojmë, që kryeministri Edi Rama ka reaguar mbi këtë situatë, ku ka kërkuar bashkëpunim nga ana e Kosovës dhe ndërhyrje nga BE për të zgjidhur çështjen.
