Presidenti i Serbisë, Aleksander Vuçiç ka biseduar me sekretarin e përgjithshëm të NATO-s, Jens Stoltenberg lidhur me tensionet në kufi me Kosovën.
Presidenti serb është nervozuar gjatë bisedës duke thënë se Serbia nuk ka thyer asnjë pikë të Marrëveshjes së Brukselit, dhe as nuk “ka rrezikuar paqen”, siç pretendon ai se ka bërë Kosova me dërgimin e forcave policore në veri.
“Pushtimi i plotë me automjete të blinduara në veri të Kosovës, i cili po kryhet nga Prishtina, ka vazhduar për shtatë ditë dhe të gjithë në bashkësinë ndërkombëtare heshtin me zë të lartë”, theksoi Vuçiç.
Më tej ai thotë se “befas shqetësohen kur shohin helikopterë dhe aeroplanë serbë në territorin e Serbisë qendrore, sepse mendojnë se ata nuk duhet të ekzistojnë, ose nuk duhet të ngrihen derisa Kurti ose dikush nga bashkësia ndërkombëtare të miratojë atë”, ka thënë presidenti serb.
Duke folur më tej për bisedën që ka pasur me Stoltenbergun, Vuçiç thotë se e ka pyetur atë se cilën normë apo rregullore ka shkelur Serbia me veprimet e saj.
Që prej 20 shtatorit, në Kosovë ka hyrë në fuqi reciprociteti i targave, ku të gjitha automjetet që hyjnë nga Serbia duhet të përdorin targa të përkohshme të lëshuara nga autoritetet e Kosovës dhe që kushtojnë pesë euro.
