Policia e Fierit ka vënë në pranga një person dhe një tjetër është vënë në hetim pasi akuzohen për zjarrvënie dhe dhunë në familje. Bëhet fjalë për të arrestuarin me iniciale K. M., 34 vjeç, banues në Frakull e Madhe, Fier, i cili sipas njoftimit nga policia, për motive të dobëta ka ushtruar dhunë fizike ndaj kushëririt të tij, të identifikuar si E. M.
Po ashtu policia ka vënë në hetim personin e identifikuar me iniciale Xh. M., banues në Peshtan, pasi duke djegur barëra në tokën e tij, si pasojë flakët e zjarrit kanë dalë jashtë kontrollit dhe është djegur një hektar me pyje si edhe një sipërfaqe me ullinj në pronësi të personit të identifikuar me inciale Y. Xh.
Sakaq, Drejtoria Vendore e Policisë Fier apelon për të gjithë banorët, që në asnjë rast mos shkaktojnë zjarrvënie, pasi do përballen me ligjin. Policia fton qytetarët që të denoncojnë në numrin 112 dhe Komisariatin Dixhital për çdo rast të zjarrvënies apo të paligjshmërisë në tërësi duke ju garantuar anonimatin dhe reagim të shpejtë e të paanshëm nga strukturat policore.
