Policia e Vlorës në bashkëpunim me Forcën Operacionale në DVP Vlorë, ka goditur një rast të shpërndarjes së drogave të forta në doza, duke arrestuar dy persona.
Në pranga kanë rënë shtetasit Admirim Çumani, 26 vjeç dhe Besmir Sadikaj, 31 vjeç, të dy banues në lagjen “Isa Boletini”, Vlorë të cilët posedonin dhe shpërndanin lëndën narkotike kokainë.
Arrestimi i tyre u bë pasi, gjatë kontrollit në lavazhin e tyre në Vlorë, u gjet dhe u sekuestrua një sasi me kokainë, e ndarë në dhjetëra doza, gati për shitje, 2 peshore elektronike dhe 2 aparat celular.
Materialet e sekuestruara i kaluan Prokurorisë së Rrethit Gjyqësor Vlorë, për veprën penale prodhimi dhe shitja e narkotikëve, e kryer në bashkëpunim.
