Gjykata e Lartë ka kthyer çështjen e ish- ministrit të Brendshëm Saimir Tahirit në Apelin e GJKKO. Tashmë Tahiri do të rigjykohet nga Shkalla e Dytë e cila do të marrë një vendim përfundimtar, pasi ishte vetë ish ministri që bëri rekurs të vendimit të GJKKO për dënimin e tij me 3 vite shërbim prove.
Në reagimin e parë pas vendimit të Gjykatës së Lartë, Tahiri u shpreh se “Do ndjekim procedurën dhe do shkojmë sërish në Apel”.
Ndërkohë avokati Haxhia renditi shkeljet proceduriale që konstatoi Gjykata e Lartë. Sipas tij, në Apelin e GJKKO do të kërkohet sërish pafajësia për Tahirin, teksa tha se tashmë çështja do të gjykohet nga një tjetër trupë gjykuese.
“Kërkimet tona ishin më të gjera se vendimi i Gjykatës. Kolegji i Apelit, ne dhe dy kolegët e tjerë e shtrimë ankimin në kërkim final, për ta zgjidhur në themel. E rrëzoi kërkesën, u përqendrua në shkeljet proceduriale. Gjykata e Lartë, vendosi prishjen e vendimit të Gjykatës së Apelit dhe paraqiti dhe arsyet që kanë të bëjnë me shkelje të rënda proceduriale që cënonin vendimin. E ktheu çështjen në po të njëjtën gjykatë me tjetër trup gjykues. Në gjykim kanë marrë pjesë gjyqtarë që kanë cënuar paanëshmërinë dhe pozicionin e individit, kanë dhënë vendime me fakte të lidhura ku nuk u shkëputën dot nga interpretimi i fakteve. Edhe pse këta gjyqtarë kërkuan dorëheqje, por nuk iu miratua. Albana Boksi dha dorëheqje, drejtuesi i Gjykatës edhe pse e kishte me shkrim nuk e pranoi. E dhamë edhe këtë shkak në Gjykatën e Lartë. Gjykata e pranoi si shkelje. Strategjia e radhës është që çështja të shkojë në Apel dhe do të insistojmë për pafajësi”, tha avokati.
Nga ana tjetër Gjykata e Lartë ka rrëzuar kërkesën e ish-drejtorit të Policisë Vlorë, Jaeld Cela për t’u liruar.
Saimir Tahiri ka kërkuar prishjen e vendimit të gjykatës së Apelit, pasi sipas tij anëtarët e trupës gjykuese kanë qenë në papajtueshmëri për të dhënë vendim, dhe kërkojnë që çështja të rikthehet në Apel dhe të gjykohet nga një trupë tjetër.
