Deputeti socialist Erion Braçe reagon pas ngjarjes së rëndë ditën e sotme në Lezhë, ku një 21-vjeçar i dyshuar për kultivim droge qëlloi për vdekje efektivin e policisë Saimir Hoxha. Ish-zëvendëskryeministri ka sulmuar qeverinë duke thënë se ndodhin këto ngjarje për shkak se në vendin tonë droga dhe krimi po konkurrojnë punën e ndershme.
“Kur ky vend humb një vajze/grua; kur ky vend humb një shërbyes shteti/oficer policie; kur ky vend humb një punëtor, burrë apo grua qofte; ky vend ka ditën e tij më të trishtë! Saimir Hoxha ishte një shërbyes i shtetit; Një oficer i policisë së shtetit në detyrë kundër krimit, kultivimit dhe tregtisë së drogës.
Ushtar i një modeli që meriton luftën tonë, si shoqëri, jo thjesht si polici.
Është modeli i parave të shpejta, të ardhura nga droga, kultivimi dhe tregtia e saj tek te rinj që shkatërrohen prej saj. Tregu i krimit këtu në fusha, ne Londër, Roterdam, Madrid ne shtëpitë e barit, është ai që konkurron punën e ligjshme e të ndershme, të ardhurat që burojnë prej saj”, shkruan ai.
Prandaj, Braçe i ka bërë thirrje organeve të drejtësisë të veprojnë pa humbur kohë. Sipas tij, është e pafalshme që këto ndodhi të tejkalohen lehtë e të merren si normalitet, kur në fakt janë tregues të qartë të krimit në vend.
“Kur flas për beteje të shoqërisë kundër kultivimit dhe tregtisë së drogës, dua të bëjmë e fitojmë betejën pa mëshirë kundër tyre, si qytetare, prindër, mësues, të rinj, policë, prokurorë, gjykatës.
Duhet ta bëjmë, tani! Nuk mund ta pranojmë si normalitet, “dëme” te pranueshme në një luftë”, u shpreh ai.
Sipas Braçes çdo institucion duhet të luftojë më fortë krimin e organizuar në vend.
