Nëna e 21-vjeçarit Aldi Rama që vrau efektivin e policisë, Saimir Hoxha, është shoqëruar pasditen e djeshme nga policia, pas ngjarjes së rëndë në Lezhë, ku ka dhënë dhe dëshminë e saj.
News 24 shkruan se Valbona Kolgjini jetonte me të motrën në Durrës, ndërsa ka deklaruar në polici se me të birin kishte pak kontakte, pasi nuk jetonte me të pas divorcit me babain e tij.
“Me djalin kisha pak kontakte, sepse pas divorcit ai qëndroi në shtëpinë e xhaxhait në Lezhë. Unë shumë pak takohesha me djalin dhe nuk isha në dijeni të asnjë aktiviteti kriminal”, ka thënë ajo në polici.
Prindërit e 21-vjeçarit ishin të divorcuar, teksa babai i tij mësohet se ndodhet në një burg në Greqi, i dënuar për vrasjen e një personi, të cilin e kishte prerë me sharrë. Nëna e tij ka qenë në Greqi dhe atje ka pasur një martesë me një shtetas grek dhe më pas ishte kthyer në Durrës ku ka krijuar një tjetër lidhje.
I riu jetonte me gjyshërit e tij, ndërsa me herët këta të fundit kanë deklaruar se nuk dinin gjë për ngjarjen e rëndë dhe se ishin njoftuar vetëm nga mediet.
Aldi Rama nuk është person i panjohur për drejtësinë, pasi ishte arrestuar më parë për shpërndarje droge, që në moshën 17 vjeçare dhe së fundi ishte në arrest shtëpie nën akuzën “Prodhim dhe mbajtje e lëndëve narkotike”.
Saimir Hoxha me origjinë nga Puka dhe banues në Tiranë, la pas dy fëmijë të mitur. Ministri i Brendshëm Bledi Çuçi bëri me dije ditën e djeshme se kanë nisur procedurat e se Hoxha do të shpallet ‘Dëshmor i Atdheut.
